Atarrabian sortutako lesakarra ala Lesakan bizi den atarrabiarra?
Nahiz eta hogei urte pasatxo daramatzadan Lesakan, ez dut lortu lesakarra izatea. Halere, ia bizitza erdia daramadanez hemen, erdi atarrabiarra, erdi lesakarra naizela erraten dut.
Lesakan ikasi duzu euskaraz?
Amak erakutsi zizkidan lehenbiziko euskarazko hitzak. Gero, euskaltegian hasi nintzen eta ondotik Gipuzkoara barnetegi batera jo nuen. Konturatu nintzenean zer diren euskalkiak Nafarroako bat ikasi nahi izan nuen eta Zubietara joan nintzen.
Zer lortu duzu Solaslagunari esker?
Jende berria ezagutu, lagunak egin, eta ekintza politetan parte hartzea.
Solaslagunarekin, zein da zure helburu nagusia?
Hemengo euskara hobetu eta ingurua, ohiturak eta… gehiago ezagutu eta lagunak egitea.
Nola tratatzen zaituzte euskaldun zaharrek?
Hagitz ongi, estimatzen dute nahiz eta Iruñea aldeko izan, euskalduna izatea eta ahalegintzen naizela ikustea.
Zer erranen zenieke euskaldun berriei?
Eutsi eta ez etsi, hemen bizitzeko euskalduna izatea ikaragarri gauza polita eta beharrezkoa dela.
Eta euskaldun zaharrei?
Esker aunitz gure euskara maitea bizirik mantentzeagatik. Erakutsiko didazu?
Zein da oraindik euskararen aldetik hobetzeko gelditzen zaizuna?
Nire hizkera hobetzea, eta batez ere, hemengo euskara gehiago ikastea.
Zer pentsatzen duzu euskaldun zaharrak erdaraz somatuta eta zu, euskaldun berria, euskaraz egiteko eginahalean ari zarela ikusita?
Adinekoa bada, euskaraz solasteagatik pasatu duenarekin pentsarazi egiten dit. Baina heldua edo gaztea bada, ez dela konturatzen herri honen altxorra galdu behar duela.
Zer du Lesakak Atarrabiak ez duena?
Herri txikia eta bizitzeko lasaia dela, mendi politak, baserriak eta euskara gehiago dituela.
Amets bat?
Euskaldunekin euskaraz solastea, ez dakienari edota euskaldun berriei laguntzea, hemengo euskaraz dena ikastea eta euskara izatea hizkuntza ofiziala Euskal Herri osoan.
